Die Oakdale-Akkerfees is die een groot fondsinsamelingsprojek wat die skool gedurende Mei aanbied. Hierdie fondsinsamelingsprojek is ʼn “ons-projek” wat ouers, oud-ouers, oudskoliere, leerders en die personeel insluit.

Die Akkerfeesnaweek sluit ʼn Akkerfeesdans op die Vrydagaand in, asook ʼn groot sportdag op die Saterdag waartydens die agtien rugbyspanne almal in aksie is. Hierdie naweek is ʼn Oakdale-gesinsnaweek en kom almal met Oakdale-verbintenis van wyd en syd om hierdie fees by te woon. Die Oakdale-vleistafel verwerk ongeveer agtien beeste, honderd-en-dertig skape en maak 1 ton wors vir verkope.

Die Akkerfeesopbrengs van R40 000 in 1997 het gegroei tot ʼn opbrengs van R737 000 in 2016.

“Ons projek” en “ons sukses”!