ONDERSTEUNERSKLUB SOOS MIN

Die Oakdale-Ondersteunersklub is saamgestel uit ouers vanuit die George-, Mosselbaai-, Knysna- en Oudtshoorn-omgewing. Hierdie groep entoesiastiese ouers bied jaarliks twee projekte aan ten einde fondse vir die skool in te vorder.

Die Oakdale-Ondersteunersklub staan onder die bekwame leiding van mnr. Jannes de Swardt as voorsitter en mev. Rozanne van Eeden as sekretaresse.

Op die sandduine by Vleesbaai het die wiele gerol tydens die uiters gewilde Oakdale-4×4-projek. ʼn Rekordgetal inskrywings van 130-voertuie is ontvang. In ideale sonskynweer het deelnemers van sover as Stellenbosch en Kareedouw hierdie projek, geborg deur Campworld & Safari Centre op Mosselbaai, ondersteun. Campworld & Safari Centre en het ook ʼn stel Cooperbande ter waarde van R15 000 geskenk aan ʼn gelukkige lootjie-eienaar. Die wenner van die stel bande was mnr. Gideon Scholtz van George.

Mev. Mariana Rheeder van George het die Campworld & Safari Centre Oakdale-ondersteuners 4×4-trofee gewen vir die bestuurder wat die beste vertoon het in ʼn standaard 4×4-voertuig.

Die jaarlikse dans in die 4 Brothers-skuur op George was die tweede projek wat die ondersteunersklub aangebied het. Daar is vanjaar ʼn totaal van 550 kaartjies verkoop en dit is tans seker een van die grootste sosiale geleenthede in die George-omgewing. Afgesien van koue en nat weersomstandighede, was dit die warm hartlikheid en gemaklike atmosfeer wat bygedra het tot ʼn suksesvolle aand.

Lancewood Holdings was weereens die hoofborg van die geleentheid. Die dans is veral vanjaar baie goed ondersteun deur die gemeenskap van die Suid-Kaap waarby baie ouers, oud-ouers en voornemende ouers van die skool ingesluit is.

Oakdale het groot waardering vir die samewerking en ondersteuning wat ontvang word van besighede en ondernemings in die George-, Oudtshoorn-, Knysna- en Mosselbaai-omgewing. Hierdie klub het vanjaar R196 900 ingesamel.

Op navraag aan die skoolhoof, mnr. Latsky, was sy opmerking die volgende: “Hierdie groep ouers is ʼn toonbeeld van entoesiasme en hoë doelwitstelling. Hul deelname en optrede getuig van absolute lojaliteit en liefde vir die skool en sy leerders. Hulle was nog nooit voorskriftelik oor hoe fondse aangewend moet word nie. Die skool is baie trots op hierdie groep ouers, asook baie dankbaar vir hul harde werk en toewyding.”

Die voete jeuk...
Jannes de Swardt (voorsitter), Rozanne van Eeden (sekretaresse) en André Latsky (skoolhoof).
Mnr. Koos Scholtz, organiseerder van die dag, het self die duine geniet.
Die manne met die 4×4-voertuie daag mekaar uit.