Oakdale is die toonaangewende skool en landwyd bekend vir puik toutrekprestasies.

Ongeveer 80 leerders neem gedurende die somer aan toutrek deel. Die skool se spanne in die verskillende gewigsafdelings wen jaarliks verskeie medaljes tydens die SA-toutrekkampioenskap.

Oakdale het met 61 leerders aan die SA-toutrekkampioenskap deelgeneem en met vier goue, een silwer- en twee bronsmedaljes weggestap. Dit was weereens die manne in die blou truie en rooi kouse wat die toeskouers beïndruk het met hul styl, fiksheid en selfdissipline. Die hoogtepunt van die dag, waarna almal met verwagting uitgesien het, was die 560 kg-kompetisie. Dit is hier waar die land se skole hul lippe aflek om die SA-560 kg-kampioen van 2015 te onttroon. Dit was egter Oakdale se 560 kg-A-span wat weereens die goue medalje gewen het terwyl die B-span die bronsmedalje ingepalm het.

Met hierdie oorwinning word Oakdale se 560 kg-toutrekspan vir die agtste keer as die SA-kampioen gekroon en sal Suid-Afrika in September in Swede by die wêreldtoutrekkampioenskap verteenwoordig. Oakdale het reeds die land by sewe geleenthede by die wêreldkampioenskap verteenwoordig waarvan hul by vier geleenthede as wêreldkampioene aangewys is.

Oakdale se 560 kg A-span wen ʼn goue medalje. Agter: Pierre Blignaut, Etienne Steyn, mnre. André Latsky (skoolhoof), Piet Lourens (afrigter), TL Steyn en Franco Cilliers. Voor: Streicher Möller, Johan Swart, Nicolaas Basson, MC du Plessis en Tiaan Conradie.
Oakdale se 600 kg A-span wen ʼn goue medalje. Agter: MJ Swart, Etienne Steyn, JJ van der Vyfer, Streicher Möller, mnr. Piet Lourens (afrigter) en Johan Swart. Voor: Tiaan Conradie, Awie Botes, Nicolaas Basson en MC du Plessis.
Oakdale se 520 kg A-span wen ʼn goue medalje. Agter: Thinus Linde, Estiaan Steyn, Koos Botha, mnr. Piet Lourens (afrigter), Matthys Swart en MJ Swart. Voor: Erik Brand, Thys Lourens, André Matthee en Janu de Swardt.
Oakdale se 480 kg C-span wen ʼn goue medalje in die plaatafdeling. Agter: Ethan Hunt, Francois Delport, Chris Pretorius en MG Taute. Middel: Armandt Baard, Nico Bester en Jakobus du Preez. Voor: Nic Meyer – waterdraer.