Jeugskou word as sportsoort op Oakdale aangebied en gee aan leerders die geleentheid om hul liefde vir diere, asook hanteringsvaardighede op tasbare wyse uit te stal. Leerders neem vanaf graad 8 deel aan Jeugskoukompetisies waarna hulle kan kwalifiseer vir die Wes-Kaapkampioenskappe.
Oakdale-leerders skou in wol- en vleisskaap, suiwel- en vleisbeeste, boerbok asook Angoras. Oakdale is welbekend vir puik prestasies in Jeugskou.
2024 het weereens goed afgeskop en die skoue het met volle vaart begin. Leerders was opgewonde om weer voluit te kan skou en te kan meeding teen omliggende skole, asook om met verskillende boere se diere te kon skou in verskeie interras-kompetisies.
Ons het vanjaar, in die onderskeie klasse, naamlik vleisbees, suiwelbees, vleisskaap, wolskaap, Angorabok, Boerbok en junior afslaers met meer as veertig leerders begin.
Leerders moes aan drie streekskoue deelneem om te kan kwalifiseer, met die nodige punte, om aan die WP-kampioenskappe op Bredasdorp, deel te neem. Daar was baie Oakdale-leerders wat in die onderskeie klasse in die junior-, sowel as die seniorafdelings, gekwalifiseer het.
Tydens die Wes-Kaap kampioenskappe op 16, 17 en 18 Junie 2024, het Oakdale weereens gewys waartoe ons in staat is en het sewentien leerders gekwalifiseer om in die WP-span opgeneem te word. Oakdale het een of twee verteenwoordigers gehad in elke klas wat aangebied is, waarvan Oakdale die suiwelbees, vleisbees en vleisskaap-klasse, gedomineer het.
Die Nasionale Jeugskou-kampioenskappe is op 22 – 25 September 2024 in Middelburg, Mpumalanga aangebied. Die WP-span het ongelukkig onttrek van die Nasionale Jeugskou-kampioenskappe as gevolg van dieresiektes soos Bek-en-klouseer in die land. Ons bedank graag JC Veebemarking vir die vervoer van ons diere gedurende die jaar.
2023 het weereens goed afgeskop en die skoue het met volle mag begin. Leerders was opgewonde om weer na gereelde onderbrekings deur verskeie beperkings in die skoubedryf, voluit te kan skou.
Ons het vanjaar, in die onderskeie klasse, met meer as sestig leerders begin: Vleisbees/Suiwelbees/ Vleisskaap/Wolskaap/Angorabok/Boerbok/Kulinêre Kuns.
Leerders moes aan drie streekskoue deelneem om te kan kwalifiseer, met die nodige punte, om aan die WP-Kampioenskappe op Augsburg, Clanwilliam, deel te neem. Agt-en-dertig van ons leerders kon in die onderskeie klasse in die junior-, sowel as die seniorafdelings, kwalifiseer.
Tydens die kampioenskappe op 20 en 21 Maart 2023, het Oakdale weereens gewys waartoe ons in staat is en het sewentien leerders gekwalifiseer om in die WP-span opgeneem te word. Ons het ‘n verteenwoordiger of twee in elke klas wat aangebied is, waarvan ons die suiwelbees, vleisbees en vleisskaap-klasse, domineer.
Die Nasionale Jeugskou-kampioenskappe was vanjaar op Clanwilliam gehou, waar 17 Oakdale-seuns deelgeneem het. Die seuns het 8 goue medaljes, 8 silwer- en 10 bronsmedaljes ontvang. Ons bedank graag Hessequa Abattoir vir die vervoer van ons diere gedurende die jaar.
Na twee baie onstuimige jare van geen skou, het die leerders die geleentheid gehad om weer te begin met albei hande aangegryp.
Ons het vanjaar, in die onderskeie klasse, met sestig leerders begin:
Vleisbees / Suiwelbees / Vleisskaap / Wolskaap / Angorabok / Boerbok / Kulinêre Kuns
Leerders moes aan drie streekskoue deelneem om te kan kwalifiseer, met die nodige punte, om aan die WP-Kampioenskappe vanjaar op Augsburg, Clanwilliam, te gaan deelneem. Een-en-dertig van ons leerders kon kwalifiseer in die onderskeie klasse in die junior-, sowel as die senior afdelings.
Tydens die kampioenskap gehou op 30 Maart tot 2 April 2022, het Oakdale weereens gewys waartoe ons in staat is en het agtien leerders gekwalifiseer om in die WP-span opgeneem te word. Ons het ‘n verteenwoordiger of twee in elke klas wat aangebied is, waarvan ons die suiwelbees, vleisbees en vleisskaap-klasse domineer.
Die SA-Kampioenskap waar hulle die span sou verteenwoordig, is ongelukkig weens die stand van Bek-en Klouseer in die land, wat vervoer van diere verbied, as gevolg van biosekuriteitsredes, gekanselleer.
Met groot teleurstelling sluit ons dan weer die jaar af waar ons leerders weer nie ‘n jaar van skou kon voltooi nie. Ons hoop die nuwe seisoen, wat nou reeds begin, sien beter daarna uit as die vorige drie jare.
Beeste
Heidelberg
Podlangs Nampo
Skape en Bokke
Wellington
