Oakdale trots op vier Kalahari Vasbytters

Oakdale leerders neem jaarliks deel aan die gesogte Kalahari Vasbyt wat deur Mnr. Andries Erwee aangebied word.

Die Hoër Landbouskool Oakdale spog vanjaar met nie minder as vier leerders wat die uitdagende Kalahari Vasbyt vroeg in Januarie 2021 voltooi het. Jorik Meyer (Mosselbaai), Danie Van Deventer (Klipdale), Marcel Orffer (Van Wyksdorp) en Wesley Barkhuizen (George) het op 4 Januarie afgeskop met die unieke uitdaging deurdat elk van hulle eers ‘n Covid 19 toets moes ondergaan. Van die aanvanklike 31 inskrywings kon slegs 23 deelneem deurdat hul negatief getoets het.

Op 6 Januarie vertrek die groep na Woodlands in Botswana. Die Vasbyt is daagliks afgeskop met 90 minute liggaamlike oefeninge wat toegeneem het in intensiteit soos wat die Vasbyt gevorder het. Van Woodlands het die groep die magtige Zambezirivier te pont oorgesteek na Livingstone. Meeste van die deelnemers het hul grootste vrese oorkom deur Reksprong “Bungy jumping” van die 130m hoë brug by die Victoria Valle.

Uitdagings gedurende hierdie oorlewingskamp het ingesluit “white water rafting” op die Zambezirivier met sy kragtige stroomversnellings, oornag in Moremi en ervaringe in die Deception Valley in Sentraal Kalahari sonder enige kampgeriewe in een van die natste reënseisoene nog. Verskeie deelnemers is dit egter eens dat die grootste uitdaging die gevreesde Roetemars was.

Die Roetemars het bestaan uit 39km stap deur bosse met verskeie goedere van die kamp wat saamgedra moes word in die hitte. Hiermee is deursettingsvermoë, spanwerk en leierskap tot die uiterste beproef. Die laaste dag in Botswana het die groep by die Khama Rhino Sanctuary deurgebring. Terug in SA by Klein Kariba was die 3km hardloop onder 15minute 30 sekondes die laaste uitdaging ten einde te kwalifiseer vir die gesogte Vasbyt sertifikaat en die titel Vasbyter te verdien.

“Die Vasbyt was een van die moeilikste dinge wat ek nog in my lewe aangepak het. Dit verander ‘n mens nie net fisies nie, maar ook emosioneel.  Ek sal dit enige tyd weer doen en ek sal ander seuns aanmoedig om dit ook te doen” was Jorik Meyer, een van die Oakdale-deelnemers se kommentaar.