Landbouopleiding

2025

i) Rovic kursus (Mnr. G. Liebenberg)
Rovic is reeds lank by die skool betrokke en vanjaar is die eerste inleidende kursus aangebied. Die kursusinhoud het oor die werking van verskillende implemente gehandel. Groot dank aan mnr. Philip Oosthuizen wat die kursus oor twee dae aangebied het.

ii) Bewaringsekologie
Tydens die kursusweek het die leerders aktief aan die verwydering van uitheemse bome in die Langeberg, spesifiek in die gebiede van Garcia-pas en die Langkloof deelgeneem. Die hoof fokus was die uitkap van Black Wattle- en Dennebome om die waardevolle fynbos in hierdie areas te beskerm en te herstel. ’n Totaal van 5 480 Dennebome en 2 831 Black Wattle-bome is uitgekap. Ons sien uit daarna om hierdie projek in die toekoms op ’n meer gereelde basis aan te pak en so ’n blywende positiewe impak op die omgewing te maak. ’n Spesiale woord van dank aan Cape Nature, asook mnre. Tielman Roos en Adohan van den Berg vir hul waardevolle bydrae en ondersteuning.

iii) Hoenderslag-kursus
Die graad 8-leerders het ook aan die hoenderslag-kursus deelgeneem, waar ’n totaal van 50 hoenders geslag is. Hierdie praktiese ervaring het die leerders blootgestel aan waardevolle vaardighede en kennis wat hul begrip van landboupraktyke verbreed het. ’n Groot dank aan Me. Jackie Geldenhuys en haar span vir hul leiding en ondersteuning tydens hierdie geleentheid.

2025

Jagkursus (Mnr. S. de Klerk)
Die kursus was baie suksesvol. Negentien seuns het ook die geleentheid gehad om aan ‘n springbokjag deel te neem waar elkeen suksesvol ‘n springbok geskiet het. Ons bedank graag al die instrukteurs wat die dag op die skietbaan betrokke was, asook dié wat saam op die springbokjag na Willowmore gegaan het. Dankie aan mnr. Willie Augustyn van Quenets vir hul groot bydrae tot die kursus. ‘n Spesiale dank aan mnr. Owen Poultney vir die beskikbaar stel van sy plaas, asook mnr. Eugene van der Bank vir die hantering van die jagdag.

2025

i) Sussex Junior Beoordelingskursus (Mnr. G. Liebenberg)
Mnre. Enrico Cronjé, Pieter Stofberg en Martin Seyfferdt het vir die eerste keer die kursus op Oakdale aangebied. Dit was ‘n baie leersame ondervinding vir die 25 seuns. Groot dank en waardering aan die Sussex Telersgenootskap vir die aanbieding hiervan.

ii) Agri Wes-Kaap (Mnr. B. Aucamp)
Vanjaar is die Agri Wes-Kaap vergaderingsprosedures-kursus aan Oakdale se graad 10- Landbouwetenskappe-leerders aangebied. Hierdie kursus het in Februarie vanjaar plaasgevind waar 29 leerders dit bygewoon het. Die leerders het meer geleer oor die samestelling en werksaamhede van Agri Wes-Kaap en georganiseerde landbou en waarom dit belangrik vir produsente is om deel van hierdie struktuur te vorm. Graag bedank ons mnr. Louis Wessels van Agri Wes-Kaap vir die interessante manier waarop hy die kursus vir die seuns aangebied het.

iii) Biologiekamp (Mnr. P. Marais)
Twintig graad 10-seuns wat Biologie as vak neem, het vanaf 2 tot 4 September 2025 die Biokamp te Grootvadersbosch, buite Heidelberg bygewoon. Die kamp is deur me. Monica Vaccaro van die Landmark Foundation, gelei. Sy is deur me. Corné Brink van Kaelvoet Consulting ondersteun, wat lesings met betrekking tot die Fynbos en Woudbome aangebied het, asook me. Jeannine Macmahon van Landmark Foundation, wat leiding met betrekking tot Luiperdgedrag en die stel van kameras, geneem het.

Seuns is touwys gemaak in natuurbewaring, herwinning, uitkenning van plant- en sleutelspesies in die ekosisteem, asook die stel van luiperdkameras. Dit alles in die bewaringsgebied van Grootvadersbosch.

Aan die einde van die kamp is die seuns geëvalueer en elkeen het ‘n sertifikaat vir deelname vanaf die Landmark Foundation ontvang. Ons bedank graag Cape Nature vir die gebruik van hul kampgeriewe te Grootvadersbosch, asook elk van ons passievolle aanbieders.

iv) Vleisbeeskursus (Mnr.T. Naudé)
Oakdale se jaarlikse vleisbeeskursus is hierdie jaar vir 23 graad 10-leerders aangebied waaronder die vleisbeesbestuur, -voeding, -siektes tot en met die slag en gradering van vleis, behandel is. Ons bedank graag mnre. Philip Terblanche, Hendrik de Waal, Thinus Viljoen, Hendré van Zyl, AJ van Wyk, John-Charles Swart en Nico Klinck vir die aanbieding van die kursus.

v) Finansiële Bestuurskursus (Mnr. P. Wessels)
Die graad 10’s se finansiële bestuurskursus is deur mnr. Johan Delport van Standard Bank aangebied. Die kursus het oor die finansiële beplanning van ‘n redelike groot boerdery, in hierdie geval ‘n suiwelplaas, gehandel. Die gebruik van toepaslike rekenaarprogramme is ondersoek en daar is prakties geoefen om hierdie state op te stel. Verskeie van die seuns het die addisionele sessies oor versekering in die landbousektor baie interessant gevind en sien uit na ‘n opvolgkursus in die komende jaar. Die kursus is leersaam, want die seuns kry te doen met begrippe en inligting rakende die finansiële verslaggewing van praktiese ondernemings wat nie deur die skoolleerplan gedek word nie.

2025

i) Wolskool (Mnr. G. Liebenberg)
Die wolklasseringskursus vir 12-leerders is gedurende Februarie en September aangebied. Groot dank aan mnre. Robert Scott en Chrisjan Oosthuizen van BKB vir die aanbieding van die kursus. Graag bedank ons BKB vir hulle jarelange betrokkenheid by die skool.

ii) Suiwelskool (Mnr. B. Aucamp)
Sewentien graad 11-leerders is vanjaar opgelei om suiwelboere te wees. Die opleiding is soos oudergewoonte, in twee dele, aangebied. Gedurende Februarie het mnr. Smiley Cronjé van Eco Lab, die kursus georganiseer. Spesialiste op elke gebied van suiwelboerdery het sy hand versterk en die seuns van die grootmaak van kalwers, melkbeesvoeding, melkbeesteling en algemene bestuur, geleer. Altesaam is sewe lesse met verteenwoordigers vanuit verskeie areas van die suiwelbeesbestuur, aangebied.

Gedurende September het mnr. Robert Bosch (CRV XSEED) die KI-kursus by Van Greunen Boerdery, naby Groot Brakrivier, aangebied. Baie moeite is gedoen om vir die leerders genoegsame oefening in die KI-proses by melkbeeste, te gee.

Graag bedank ons mnre. Smiley Cronjé vir sy entoesiasme en die koördinering van die kursus, sowel as Robert Bosch vir die moeite met ons seuns. Ander aanbieders wat betrokke was sluit in mnre. Pieter Steenkamp (boer), Willie Cronjé (Agribisi), Dawid van der Rijst (Lactalis), Christiaan Swart en Theo Nel (Microbasics, Surromel, Clover, Nukamel), asook Hanno Pretorius (Hanno Pretorius Velddienste, Delaval). Ons bedank graag Ecolab vir hul betrokkenheid by ons melkery.

iii) Groentekursus (Mnr. JB Naudé)
o Klein Karoo Saadproduksie (KKSP)
Twintig van ons graad 11-leerders het Klein Karoo Saadproduksie besoek waar leerders deur kundiges toegespreek is. Die kursusinligting het oor die proewe wat op Besemkop gedoen word, saadontvangste vanaf kliënte, asook die laboratorium gestrek. Dit was vir ons leerders noemenswaardig hoe elke lid van die span met passie oor baie kennis beskik.

o AgroFors
Die leerders het Agrofors (Klein Karoo Saadproduksie se weidingsaadkomponent) buite George besoek waar die seuns meer van weidingsgewasse, -mengsels en grond-gesondheid geleer het.

o Curativo
Die leerders het ook Curativo besoek deur hulle proewe wat op Oakdale se gronde geplant is. Ons leerders het dit baie leersaam gevind en opnuut die belangrikheid besef van Curativo se proewe, om middels te toets, wat tot plantgesondheid bydra.

Graag bedank ons Klein Karoo Saadproduksie, Agrofors en Curativo vir hulle moeite en kennis wat hulle met ons seuns gedeel het.

iv) Landbou Werkgewers Organisasie (LWO)
Die LWO-kursus is gedurende Julie op Oakdale vir 34 graad 11-Landbouwetenskappe-leerders aangebied. Die seuns het van arbeidswetgewing en die gebruik van dissiplinêre prosedures op plase geleer. Hierdie beginsels wat geleer is, is nie slegs van toepassing op landbou nie, maar in alle werksomstandighede. Graag bedank ons mnr. Meyer Louw van die LWO vir die aanbieding van die kursus.

v) BKB Skaapkursus (Mnr. B. Aucamp)
Een-en-twintig graad 11-leerders wat die vak Landboubestuurspraktyke neem, het die afgelope jaar die BKB Skaapkurus bygewoon. Die kursus was deur mnr. Giepie Calldo van BKB aangebied. Dit behels die bestuur van skape op verskeie vlakke soos voeding, reproduksie, teling en algemene bestuur.

Daar is ook geleer oor die korrekte hantering van skape deur mnr. Chrisjan Oosthuizen van BKB, oud-leerder van Oakdale. Mnr. Calldo het ook die leerders geleer om as beoordelaars vir die Merino-ras op te tree. Mnre. Calldo en Oosthuizen word bedank vir hul groot bydrae tot die skaapopleiding van ons leerders.

Geen kursus word aangebied nie.