2023
Natuurleweklub (Mnr. J. Le Roux)
2023 het ‘n reeks opwindende aktiwiteite en uitdagings vir die Oakdale-Natuurleweklub gebring. Met ‘n spesiale fokus om ‘n liefde vir die natuur en avontuur te kweek, het ons lede die geleentheid gebied om die pragtige buitelewe te ervaar. Hier volg ‘n oorsig van ons aktiwiteite gedurende die jaar:
Blombos-Jongensfontein Staptog
Die jaar het met ‘n Blombos-Jongensfontein Staptog gedurende Maart afgeskop. Hierdie twee-dag geleentheid het ons lede die kans gebied om die unieke kuslyn, tussen Witsand en Jongensfontein, te verken en het gesorg vir asemrowende natuurskoon en see-lewe. Ongelukkig het ons lede ook die impak wat plastiek-besoedeling langs ons kus gesien en het dit hul bewustheid van die bewaring van ons omgewing verhoog.
Cederberg-staptog
Die beplande Cederberg-staptog wat vir Junie geskeduleer was, kon ongelukkig nie vanjaar plaasvind nie. Vloede in die area en die sluiting van die toegangspaaie tot die Cederberg-bewaringsarea , het ons gedwing om ons planne te heroorweeg. Weens die gewildheid van hierdie toer sal ons egter poog om dit volgende jaar weer aan te bied.
Harkerville-staptog
Gedurende September het ons die Harkerville-staproete aangepak. Hierdie geleentheid het ons lede na die tuiste van inheemse woude, fynbos en asemrowende kuslyne gelei. Die moeilikheidsgraad van die roete en die feit dat al ons lede die staptog voltooi het, het ‘n gevoel van samewerking en kameraadskap tussen ons lede gekweek.
Oranjerivier-roei
Die jaarlikse Oranjerivier-roei was weereens ‘n groot sukses. Twintig Oakdale-bulle het die wilde waters van die Oranjerivier op hierdie vyf dae lange avontuur in die Oktober vakansie aangepak.
Toekomstige Inisiatiewe
Ons kyk vooruit na 2024 met groot opwinding. Ons sal voortgaan om uitdagende en opwindende aktiwiteite te beplan wat ons lede aanmoedig om die natuur te waardeer en ‘n dieper verhouding daarmee te ontwikkel.
