Die gebruik van die sportsentrum vir kondisionering van ons sportspanne bly ‘n waardevolle fasiliteit. Die kondisionering van sportspanne is een van die belangrikste elemente by sportspanne om sukses te behaal. Kondisionering hou baie voordele vir verskeie sporte in. Een van die voordele is dat dit help om beserings te voorkom, daarom is ‘n sportsentrum van ‘n hoë standaard belangrik tot die ontwikkeling van ons leerders. Die beskikbaarheid van twee Biokinetici en ook kondisioneerders, bly ‘n luuksheid wat bydra tot goeie, fisiese voorbereiding van ons sportspanne. Die beskikbaarheid van Biokinetici vergemaklik ook die rehabilitasieproses na beserings. Afgesien van doelgerigte oefening en voorbereiding van ons seuns, bevorder dit ook ‘n gesonde leefstyl tussen ons leerders.
Tydens hierdie sportseisoen was daar gemengde welslae, maar ons seuns se kondisionering was regtig van top gehalte. Oakdale se o. 19A- en o. 16A-rugbyspanne het algeheel 8ste in die land geëindig. Die toutrekspan het weer goud by die wêreldkampioenskappe behaal. Verskeie seuns het by die ASA-atletiek byeenkoms deelgeneem. Ons sal altyd doen wat tot voordeel van die seuns se ontwikkeling is. Ons poog daarom om by elke ouderdomsgroep ‘n kondisioneerder te hê, sodat daar genoeg aandag aan leerders ten opsigte van kondisionering, gegee word.
Die sportsentrum bied ook vir die publiek ‘n geleentheid om ‘n gesonde leefstyl te handhaaf, deur “bootcamp’- klasse wat aangebied word. Die binnenshuise-swembad gun ook ons leerders, asook die publiek ‘n geleentheid om hul watersporte te beoefen. Dankie aan elke leerder vir hul goeie samewerking, asook hul positiewe ingesteldheid tydens sessies en die wyse waarop hulle daagliks die sessies aanpak.
Ek bedank graag mnre. A. Jansen, E. Durrheim, P. Hattingh en I. van Zyl vir hul groot bydrae tot die fisiese voorbereiding van ons seuns. Dankie vir julle deurlopende professionaliteit. Ek bedank ook mnr. Theron Liebenberg vir sy waardevolle bydrae as fisioterapeut. LOJALITEIT- EENHEID- RESPEK
